Епидемијата на ебола во Демократска Република Конго и Уганда продолжува да се засилува и да претставува сериозна закана за глобалното јавно здравје. Најновите податоци на Светската здравствена организација (СЗО) откриваат загрижувачки тренд – досега се заразени најмалку 75 здравствени и медицински работници во двете земји, кои се на првата линија на борбата против опасниот вирус.
Според официјалните извештаи, ширењето на вирусот од сојот Бундибугио останува исклучително активно, особено во источниот дел на Конго, додека во соседна Уганда случаите се директно поврзани со прекуграничен пренос на инфекцијата.
Црната статистика на СЗО
Заклучно со 10 јуни, во Демократска Република Конго се регистрирани 676 потврдени случаи на ебола, од кои 136 завршиле со смртен исход. Од друга страна, во Уганда досега се потврдени 19 случаи и два смртни исходи, додека уште еден случај во моментов се води како веројатен. Најголемиот дел од заразените во Уганда се лица кои неодамна пристигнале од Конго или биле во директен контакт со веќе заразени пациенти.
Особена загриженост кај меѓународните здравствени власти предизвикува фактот што вирусот масовно навлегува во болниците. Во Конго е потврдена зараза кај најмалку 16 здравствени работници, додека останатите медицински случаи се распределени низ здравствените системи на двете земји, каде што изложеноста на вирусот е енормно висока поради секојдневниот близок контакт со заболените.
Нема вакцина за опасниот сој
Епидемијата е предизвикана од специфичниот сој Бундибугио, за кој во моментов не постои одобрена вакцина, ниту специфична терапија. Од СЗО предупредуваат дека стапката на смртност кај потврдените случаи може да достигне од 30 до 50 проценти. Сепак, експертите нагласуваат дека раното откривање на симптомите и навремената медицинска грижа значително ги подобруваат шансите за преживување на пациентите.
Поради сериозноста на ситуацијата и брзото ширење на заразата преку границата меѓу Конго и Уганда, СЗО веќе ја прогласи оваа епидемија за јавноздравствена криза од меѓународно значење. Упатен е итен повик за засилена регионална соработка, строга контрола на движењето на населението и подигнување на подготвеноста на здравствените системи во сите соседни земји.
Медицинските експерти предупредуваат дека ситуацијата на терен е динамична и се менува од час во час. Се очекува бројот на потврдени случаи дополнително да расте во следниот период, главно поради интензивираното тестирање и откривањето на претходно нерегистрирани инфекции. Во Конго во моментов веќе се истражуваат стотици сомнителни случаи и смртни исходи кои се поврзуваат со еболата.