Еден човек почина откако беше нападнат и распарчен од ајкула додека пливаше на популарната плажа Соренто во државата Западна Австралија. Ова е најновиот во низата слични инциденти во земјата, а се случува само неколку дена по нападот на сурфер во истата сојузна држава.
Полицијата на Западна Австралија соопшти дека службите за итни случаи биле повикани околу 10:30 часот по пријава за инцидент во морето.
„Ајкулата го нападнала пливачот додека пливал во морето недалеку од брегот“, соопшти полицијата, според австралиските медиуми.
И покрај обемната потрага од воздух и море што ја започнаа властите, пливачот подлегнал на повредите. Плажата Соренто, која е оддалечена околу 20 километри од Перт, е затворена за капачите, а локалните власти ги затворија и сите други плажи под нивна надлежност.
Очевидци сведочеа за застрашувачките глетка. Медицинска сестра изјави за „Сиднеј Морнинг Хералд“ дека видела како ајкулата го „распарчува“ човекот и „го фрла напред-назад како риба“, додека друг сведок за државната телевизија АБЦ потврдил дека видел крв во водата.
Ова е четврти фатален напад од ајкула во Австралија оваа година, од кои два се случија во водите покрај западниот брег, вклучувајќи го и минатонеделниот инцидент каде 56-годишен сурфер ја изгуби ногата на плажата Гленфилд.