Државниот завод за ревизија (ДЗР) утврдил повеќе слабости и неправилности во работењето на Агенцијата за задолжителни нафтени резерви при контролата на финансиските извештаи за 2024 година и усогласеноста со законските прописи.
Ревизорите изразиле мислење без резерва за реалноста и објективноста на финансиските извештаи, но дале мислење со резерва во однос на усогласеноста на работењето со законите, подзаконските акти и воспоставените политики.
Во извештајот се наведува дека Агенцијата во повеќегодишен период не доставила предлог-одлука за количината и структурата на задолжителните нафтени резерви до надлежното министерство. Утврдени биле и исплати на плати и надоместоци кои не биле целосно усогласени со законската регулатива, како и неправилности во евидентирањето на полното работно време.
ДЗР потсетува дека и при ревизијата за 2018 година биле констатирани слабости, при што дел од дадените препораки во меѓувреме биле реализирани, дел се уште се спроведуваат, а една останала нереализирана.
Како посебно прашање, ревизорите ги посочуваат состојбите со невратена позајмица на мазут од државен орган подолг период од седум години, како и трајното издавање на нафтени деривати од резервите врз основа на одлуки на Владата по прогласена кризна состојба.
Ревизијата укажува и на слабости во законската регулатива, меѓу кои нејасни правила за усогласување на вредноста на залихите, неусогласеност на надлежностите за донесување подзаконски акти меѓу Владата и Министерството за енергетика, како и нерегулиран мандат на директорот и постапката за именување вршител на должност.
Дополнително, ДЗР констатирал дека во Агенцијата не е воспоставена функција на внатрешна ревизија, што претставува слабост во системот на внатрешни контроли.
Од ДЗР информираат дека нацрт-извештајот од овластениот државен ревизор не бил предмет на забелешки од страна на Агенцијата.