Рускиот претседател Владимир Путин пристигна во Кина придружуван од соработник кој ја носеше таканаречената „нуклеарна актовка“ – уред наменет за командување со стратешките нуклеарни сили на Русија, пренесе АПА повикувајќи се на руски медиуми. Член на придружбата им потврдил на новинарите дека станува збор за специјална актовка која е дел од рускиот систем за нуклеарна команда и контрола.
Уредот, познат како „Чегет“, му овозможува на државното раководство да одржува безбедна комуникација со воената команда и да издава наредби за употреба на нуклеарно оружје, објави 4news.mk. Иако снимката привлече внимание во јавноста, ваквата придружба е редовна протоколарна пракса при патувањата на рускиот претседател. Слични снимки беа забележани и за време на неговата посета на Пекинг во октомври 2023 година, кога по средбата со кинескиот претседател Си Џинпинг зад него одеа двајца униформирани руски офицери со вакви актовки.
Системот „Чегет“ не е директно поврзан со нуклеарниот арсенал и не може самостојно да послужи за лансирање напад. Неговата функција е да ја потврди автентичноста на наредбата издадена од претседателот, по што таа се пренесува до Генералштабот на вооружените сили на Русија, кој е надлежен за нејзино извршување.
Најновата снимка е објавена во пресрет на утрешната средба во кинескиот град Шенжен меѓу Владимир Путин, американскиот претседател Доналд Трамп и кинескиот претседател Си Џинпинг, на која се очекува една од главните теми да биде контролата на нуклеарното оружје. Присуството на актовката покрај рускиот претседател не значи зголемување на нуклеарната подготвеност на Русија.

