Тежок случај на насилство ја вознемири јавноста во Охрид, откако девојка била физички нападната од својот партнер, претепана до онесвестување и оставена на улица пред маркет. За нападот е приведен 31-годишен охриѓанец.
Според досегашните информации, настанот започнал по расправија меѓу девојката и нејзиниот партнер, откако претходно биле заедно во угостителски објект. Потоа продолжиле со автомобил, каде што, според објавените информации, нападот продолжил.
Девојката била тепана сè додека не ја изгубила свеста. Осомничениот потоа продолжил да вози низ градот, а кога таа повторно се освестила, наводно ја исфрлил од возилото во близина на маркет и ја оставил на улица.
Повредената била итно пренесена во болница, каде што е задржана на лекување. Според информациите објавени од „Слободен печат“, таа е сместена на одделението за коскено-зглобни заболувања, а биле направени и повеќе дијагностички испитувања, меѓу кои и компјутерска томографија на главата.
Од СВР Охрид потврдија дека осомничениот Х.К. (31) бил лишен од слобода на 15 ноември во 05:05 часот.
„Постапувајќи по претходна пријава дека физички ја нападнал неговата девојка, полициски службеници од СВР Охрид го лишија од слобода Х.К. (31) од Охрид. По целосно документирање на настанот, против него ќе биде поднесена соодветна кривична пријава“, информираат од полицијата.
Случајот предизвика дополнително внимание во јавноста, а околностите и мотивите за нападот треба да бидат утврдени во понатамошната постапка.

