Лидерот на СДСМ, Венко Филипче, упати честитка до граѓаните по повод 13 Ноември – Денот на ослободувањето на Скопје, порачувајќи дека слободата извојувана од борците во НОБ претставува обврска која мора да се чува и пренесува на идните генерации.
Во објавата на социјалните мрежи, тој упати остри критики за актуелната состојба во главниот град, оценувајќи дека Скопје е повторно заробено.
„На овој ден им оддаваме почит на хероите од Народноослободителната борба, на нивната храброст, пожртвуваност и непокор, на партизаните што го ослободија Скопје од фашистичкиот окупатор. Тие се бореа и се жртвуваа за слобода, за достоинство и за иднина на Скопје – да биде град на сите граѓани. Слободата што ни ја оставија хероите од НОБ не е само историски спомен, таа е наша обврска што треба да ја чуваме и пренесуваме на идните генерации. За жал, денес Скопје повторно е заробено од неспособната и криминална власт на ВМРО, која го претвори главниот град во заложник на сопствените бизнис-интереси. Градот тоне во сообраќаен хаос, преполн со ѓубре и диви депонии, со небезбедни улици и нефункционални јавни услуги. Наместо развој и европска метропола, скопјани добија град во кој секојдневието е борба за основните потреби“, пишува Филипче.
Тој нагласува дека граѓаните не заслужуваат ваква состојба и најави континуирана борба за враќање на градот.
„Водени од вредностите за кои се бореа генерациите пред нас – слобода, солидарност, правда и достоинство, ќе ја продолжиме борбата против криминалната власт, ќе го вратиме Скопје на граѓаните. Вечна слава на хероите од Народноослободителната борба“, истакнува претседателот на СДСМ, Филипче.