Дополнетиот предлог за изменување и дополнување на Буџетот за 2026 година е на дневен ред на денешната собраниска седница, а министерката за финансии Гордана Димитриеска-Кочоска во своето експозе истакна дека измените се во насока на обезбедување стабилност во буџетот и сигурност за граѓаните и стопанството.
Според Димитриеска-Кочоска, со ребалансот се прави неопходно приспособување на приходите и расходите врз основа на реалните економски текови и потребата од рационално управување со јавните средства.
Говорејќи за причините за приспособувањето на буџетот, министерката за финансии нагласи:
„Тоа значи поголема буџетска дисциплина, внимателно планирање на расходите и максимална оптимизација на приходите, без да се доведе во прашање редовното исполнување на обврските на државата. Она што е најважно за јавноста и граѓаните е дека Дополнетиот ребаланс не произлезе поради проблеми со ликвидност во Буџетот, туку е последица на преземените мерки од страна на Владата за намалување на ДДВ и акцизата кај бензините и дизелот. Мерки кои имаат директно влијание врз приходната страна на Буџетот, но најзначајно е дека со таквите мерки го поддржавме стандардот на граѓаните и ја помогнавме економијата, односно го спречивме прелевањето на високите цени на нафтата врз останатите производи и услуги“
Таа порача дека до крајот на годината државната каса е стабилна и дека е обезбедено редовно финансирање на сите обврски – плати, пензии, социјални надоместоци, обврски кон стопанството и отплата на долговите.
Со Дополнетиот ребаланс на Буџетот, вкупните приходи се планирани на ниво од 374,2 милијарди денари (пониско за околу 5,3 милијарди денари од првичните проекции), додека вкупните расходи се исто така коригирани нанадолу на 420,5 милијарди денари, со што буџетскиот дефицит останува непроменет на ниво од 46,3 милијарди денари.
Со измените се обезбедуваат дополнителни 3,7 милијарди денари за социјални трансфери, од кои 1,4 милијарди за социјални надоместоци и 887 милиони денари за здравствена заштита.
За Министерството за социјална политика, демографија и млади се издвојуваат уште 1,8 милијарди денари за поддршка на ранливи категории, социјална помош, народни кујни и социјални услуги, како и дополнителни 600 милиони денари за исплата на породилните надоместоци.
Објаснувајќи ги измените кај капиталните ставки, Димитриеска-Кочоска изјави:
„Зад овие бројки и ставки стојат нашите граѓани и тие за нас се приоритет, затоа во креирањето на измените опфативме ставки кај кои имаше одложување на реализацијата и користењето на средствата. Оттука направена е корекција кај капиталните расходи, но притоа е задржана развојната компонента и определбата на државата за понатамошна поддршка на економската активност преку јавни инвестиции“
Министерката додаде дека продолжуваат вложувањата во одбраната, патната, железничката и комуналната инфраструктура, енергетската ефикасност, образованието и земјоделството, како и финансиската поддршка за капиталните проекти на сите општини.