Унгарскиот премиер Петер Маѓар потврди дека Арон Орбан, брат на неговиот претходник Виктор Орбан, е приведен во рамки на истрагата што се води за шверц со луѓе.
Маѓар ја коментираше веста синоќа за време на престојот во Берлин, откако унгарското антикорупциско тело објави дека привело четири лица и извршило претрес на повеќе локации во Будимпешта.
Во својата изјава на маргините од говорот во германската престолнина, Маѓар истакна:
„Тројца од поранешните министри на Орбан веќе се приведени. Неговиот брат веќе беше приведен денеска“
Приведувањето се однесува на 49-годишниот Арон Орбан, додека поранешниот премиер Виктор Орбан ја критикуваше оваа постапка, оценувајќи ја како политичка одмазда.
Националната канцеларија за враќање и заштита на средства (NVVH) во официјалното соопштение не ги откри идентитетите на лицата, но посочи дека четворицата осомничени се товарат за помагање на виетнамски државјани да влезат во Западна Европа во текот на 2024 година.
Оваа канцеларија беше формирана од актуелниот премиер Маѓар за истрага на наводите за корупција за време на 16-годишното владеење на Орбан.
Во меѓувреме, во одделни истраги за обвиненија за поткуп се наоѓаат и двајца поранешни министри од владата на Орбан, како и поранешниот гувернер на централната банка, Ѓерѓ Матолчи.