По повод одбележувањето на 37-годишнината од падот на Берлинскиот ѕид, германскиот канцелар Фридрих Мерц упати порака за заштита на демократијата и слободата, потсетувајќи на историската тежина што датумот 9 ноември ја носи за германската држава.
Во својата објава на платформата Икс, Мерц потсети на трите клучни историски настани кои се случиле токму на овој датум:
- 1918 година: Прогласувањето на Вајмарската Република, по абдикацијата на германскиот цар Вилхелм II.
- 1938 година: Кристалната ноќ, со која започнаа бруталните нацистички погроми врз еврејското население.
- 1989 година: Падот на Берлинскиот ѕид, кој го отвори патот за повторно обединување на Западна и Источна Германија.
„Деветти ноември ги симболизира и најтемните и најсреќните моменти во нашата историја – антисемитизмот и прогонот, почетокот на демократијата и падот на ѕидот. Слободата и демократијата никогаш не треба да се земаат здраво за готово. Да ги браниме и во Германија и во Европа“, истакна канцеларот Мерц.
Како дел од денешната агенда, германскиот канцелар ќе присуствува на свечена церемонија во Минхен по повод 20-годишнината од изградбата на синагогата „Охел Јакоб“. На настанот му се придружуваат баварскиот премиер Маркус Зедер и претседателката на баварскиот покраински парламент, Илзе Ајгнер.