Силни детонации ги вознемирија жителите на повеќе градови во централна Србија откако српската воена авијација проби звучен ѕид при итна операција за пресретнување патнички авион.
Од Министерството за одбрана на Србија информираат дека реакцијата следувала по известување од Контролата на летање (SMATSA) за можна експлозивна направа во авион на „Виз ер“ кој сообраќал од Брисел кон Софија.
Борбените авиони го следеа патничкиот авион низ целата рута над српската територија до бугарската граница, обезбедувајќи го воздушниот простор пред да се вратат во базата Батајница.
Од ресорното министерство изразија жалење за вознемиреноста кај граѓаните во Крагуевац, Јагодина, Ќуприја и околните места, појаснувајќи дека детонациите биле последица на пробивањето на звучниот ѕид при максималната брзина со која авионите морале да реагираат.
Оваа интервенција доаѓа во време кога се регистрирани бранови од лажни дојави за експлозивни направи на европските аеродроми и летови.
Во текот на вчерашниот ден беа забележани закани на речиси 30 летови во Европа, меѓу кои и на летот на „Ер Србија“ за Букурешт, кои по проверката од надлежните служби се покажаа како неосновани.