Угостителските објекти во Скопје добиваат посебен термин за одлагање на отпадот, кој ќе може да се фрла секој ден до 1 часот по полноќ.
Оваа новина следува по усвоените измени на Одлуката за комунален ред на последната седница на Советот на Град Скопје, поднесени по иницијатива на градоначалникот Орце Ѓорѓиевски.
Од Град Скопје појаснуваат дека посебниот режим се воведува поради специфичното работно време на рестораните, кафулињата и баровите, како и поради поголемите количини на отпад што ги генерираат. Со мерката се цели да се растоварат контејнерите наменети за домаќинствата, кои честопати се преполнуваат.
Екипите на ЈП „Комунална хигиена“ веќе започнаа со склучување поединечни договори со угостителите, кои ќе добијат сопствени садови за смет, а услугата за собирање и транспорт ќе ја плаќаат според официјалниот ценовник на претпријатието.
Унапредувањето на комуналниот систем во главниот град е поддржано и со процесот на набавка на 3.300 нови контејнери за замена на оштетените садови и зголемување на капацитетите на терен, во комбинација со нови специјализирани возила.
Од ноември минатата година, за домаќинствата во станбените објекти важи правилото за фрлање смет од 6 до 22 часот со предвидена казна од 50 евра за непочитување, додека новата одлука ја прецизира процедурата за бизнис-секторот во угостителството.