Премиерот Христијан Мицкоски најави дека во следните неколку дена, заедно со гувернерот на Народната банка и министерката за финансии, ќе има средби со повеќе финансиски институции кои би можеле да ја преземат Алта банка Битола. Според него, целта е да се најде нов сопственик и да се избегне стечај на банката, за која тврди дека е во одлична финансиска состојба.
„Се обидуваме од петни жили да најдеме решение, односно купувач кој ќе ја купи банката. Следните неколку дена, заедно со гувернерот и министерката за финансии, ќе имаме средби со повеќе финансиски институции кои би можеле да бидат потенцијални купувачи“, изјави Мицкоски.
Премиерот повтори дека сите штедачи и доверители ќе бидат целосно обесштетени дури и во случај на стечај, посочувајќи дека најголемиот дел од депозитите се осигурени, а вредноста на активата на банката е значително поголема од побарувањата.
Тој ја обвини СДСМ дека се радува на најлошото сценарио и дека преку кризата, која според него е увезена од Србија, се обидува да добие политички поени. Мицкоски ги повика граѓаните да не подлегнуваат на шпекулации и уверува дека Владата и Народната банка располагаат со инструменти со кои ја контролираат состојбата.
„Целта е да се спаси банката, бидејќи навистина станува збор за здрава финансиска институција“, порача премиерот.