Одделот за сузбивање на организиран и сериозен криминал (ОСОСК) при МВР, под раководство на јавен обвинител од Основното јавно обвинителство за гонење на организиран криминал и корупција, спроведе координирана акција во која е разбиена петчлена криминална група од Куманово осомничена за изнуда и перење пари.
Во акцијата се лишени од слобода Д.П. (37), Л.К. (73), М.К. (27) и Д.Ж. (43), сите од Куманово, додека петтиот член, З.Р. (35), е недостапен за органите на прогонот. Против сите петмина е поднесена кривична пријава.
Во текот на вчерашниот ден извршени се претреси на шест локации во Куманово, при што се пронајдени и одземени договори за заем со високи камати, документи за солемнизација на недвижен имот, парични средства, возила, мобилни телефони и други електронски уреди.
Според истрагата, групата ја формирал Д.П. во 2021 година. Во еден од документираните случаи од 2023 година, тој на оштетено лице му дал заем од 4.000 евра со рок на враќање од еден месец и камата од 2.500 евра. И покрај тоа што позајмениот износ бил целосно вратен, осомничениот побарал жртвата да ја користи својата сметка за фиктивни уплати и повлекувања, по што започнал со закани и барања за залог на возило.
По налог на Д.П., во адвокатска и нотарска канцеларија биле изработени фиктивни договори за купопродажба и заем од 1.000.000 денари, со фалсификување потписи, врз основа на што возилото било препишано на име на З.Р., а на оштетената ѝ била блокирана сметката преку извршител. Во втор случај, уште едно лице било изнудувано за дополнителни камати и покрај тоа што ги вратило позајмените 180.000 денари.