Континуираната поддршка од Европската Унија овозможува натамошна модернизација на земјоделските стопанства и преработувачката индустрија, воведување нови технологии и усогласување со европските стандарди, истакна министерот за земјоделство, шумарство и водостопанство, Борче Серафимовски, на состанокот на Секторската работна група за земјоделство и рурален развој.
Серафимовски ги посочи клучните фокусни точки за развој на овој сектор во наредниот период.
„Посебен акцент ќе ставиме на консолидацијата на земјоделското земјиште, развојот на системите за наводнување, зајакнувањето на задругите и организациите на производители и подобрувањето на земјоделските вредносни синџири“, нагласи министерот Серафимовски.
Тој посочи дека идните мерки ќе бидат насочени кон климатски отпорно и еколошки одржливо земјоделство, ревитализација на руралните средини, поддршка за младите земјоделци, жените и малите стопанства, како и унапредување на безбедноста на храната.
„Нашата заложба е да продолжиме со ефикасно спроведување на ИПАРД III програмата, но и навремено да се подготвиме за новиот финансиски период 2028–2034 година. Активно работиме на идентификување на идните можности за финансирање, имаме капацитети за квалитетни инвестициски проекти за успешно користење на европските средства“, истакна Серафимовски.
На состанокот, каде што учествуваше и раководителот на Секторот за операции во Делегацијата на ЕУ, Евоут Сандкер, беа разгледани приоритетните области по 2027 година, статусот на ИПА-проектите и придобивките од заедничкото уредување на пазарите.
Во однос на Извештајот на ЕК за 2026 година, министерот порача дека ресорот целосно ќе се фокусира на исполнување на обврските и спроведување на реформите.