Грчките служби спречија шверц на над 200 килограми канабис, кои под декларација за облека пристигнале на аеродромот „Елефтериос Венизелос“ во Атина. Запленетата дрога, чија вредност се проценува на околу еден милион евра, била испратена од Тајланд во август годинава.
Спречувањето на влезот на наркотиците во Грција е резултат на соработката меѓу Дирекцијата за борба против дрога и Одделението за сузбивање на шверц при царинската управа на аеродромот, по претходно добиени оперативни информации.
Запленетите 207 килограми и 466 грама суров канабис биле откриени во магацин за привремено складирање стока. Дрогата била распоредена во 48 картонски кутии, поставени на две палети.
Проверка на документацијата покажала дека пратката била транспортирана со авион од Тајланд, при што како содржина во придружните документи била наведена единствено облека.
– Се проценува дека очекуваната финансиска добивка од понатамошната дистрибуција на запленетата количина канабис би достигнала до 1.000.000 евра, соопштија од грчката полиција.
Надлежните органи информираат дека истрагата продолжува со цел целосно расчистување на случајот и откривање на сите вмешани лица.