Граѓаните кои имаат платежни сметки во Алта банка АД Битола, но не поседуваат платежни картички, од денеска ќе можат да ги подигнуваат парите директно на шалтерите во главната филијала на банката во Битола.
За оваа намена ќе бидат отворени повеќе шалтери на улицата „Добривое Радосављевиќ“ бр. 21, каде што ќе се врши исплата на готовина. Мерката особено се однесува на пензионерите и корисниците на социјална помош кои средствата ги примаат преку сметки во оваа банка, информираат од Народната банка.
Максималниот износ што граѓаните ќе можат да го подигнат е 20.000 денари во период од две недели.
Од 6 ноември, како и во сабота на 7 ноември, филијалата ќе работи во две смени за да се овозможи побрза услуга и да се опслужат што поголем број клиенти.
Исплатата ќе се организира во повеќе денови, согласно однапред утврден распоред. Секој клиент ќе добие СМС-порака со точниот датум и термин за подигање на средствата.
Од Народната банка апелираат граѓаните да ги почитуваат добиените термини и да не доаѓаат во филијалата пред закажаното време или во денови кога не се повикани, со цел да се избегнат гужви и непотребно чекање. За граѓаните кои нема да можат да дојдат во предвидениот термин ќе бидат обезбедени дополнителни можности за исплата.
Шалтерите ќе служат исклучиво за подигање готовина, без можност за извршување други банкарски трансакции.
Во меѓувреме, се подготвува отворање вакви шалтери и во други градови низ земјата, наменети за пензионерите и примателите на социјална помош. За дополнителните локации, Народната банка најави дека јавноста ќе биде навремено информирана.