Продлабочување на економската соработка, привлекување нови инвестиции и унапредување на партнерството меѓу Македонија и германската сојузна покраина Северна Рајна-Вестфалија биле во фокусот на работната средба на премиерот Христијан Мицкоски со премиерот на оваа германска покраина, Хендрик Вуст.
Како што објави Мицкоски на својот фејсбук-профил, на средбата со премиерот Вуст присуствувал и владиниот тим составен од вицепремиерот и министер за транспорт Александар Николоски, министерот за надворешни работи и надворешна трговија Тимчо Муцунски и министерката за енергетика, рударство и минерални суровини Сања Божиновска.
За време на разговорот било истакнато значењето на германските инвеститори кои веќе остваруваат деловни активности во земјава.
„Германските компании ‘Костал’, ‘Кромберг и Шуберт’, ВИК, ‘Гересхајмер’ и други реномирани инвеститори што веќе работат во земјата се пример за потенцијалот за привлекување нови инвестиции од Северна Рајна-Вестфалија“, посочува Мицкоски.
На средбата било изразено задоволство од спроведувањето на заедничката декларација за намери за соработка во економијата, инвестициите, образованието, културата, здравството и европската интеграција.
Како посебно значајна била издвоена подготвеноста на Вуст да ја посети Македонија, што според македонската делегација ќе отвори нови можности за унапредување на односите.
Продолжуваме да градиме силни партнерства, да привлекуваме нови инвестиции и да ги отвораме вратите за економски развој и нови можности за нашата држава – наведува Мицкоски во објавата.