„Окта“ гази: За 9 месеци заработила чисти 33,5 милиони евра – раст на профитот за 361%

Нафтената компанија „Окта“ ја зголемила нето-добивката за дури 361 процент во првите девет месеци од годинава, заработувајќи 33,5 милиони евра, наспроти 7,3 милиони евра во истиот период лани. Приходите од продажба се повеќе од двојно зголемени и достигнале речиси 937 милиони евра, главно поради зголемената продажба на домашниот и странските пазари, но и повисоките цени на горивата. Само во третиот квартал компанијата остварила добивка од 14,3 милиони евра и приходи од над 408 милиони евра. Од „Окта“ посочуваат дека подобрите финансиски резултати се должат и на користењето на продуктоводот Солун – Скопје, кој овозможил поголем обем на снабдување на регионалниот пазар. Значително влијание врз добивката имало и зголемувањето на вредноста на залихите во услови на нестабилни цени на нафтата на светските берзи.