Бугарските власти запреле увоз на речиси 20 тони јаболка од Македонија, откако контролите покажале присуство на остатоци од пестициди над дозволените вредности.
Станува збор за пратка тешка 19.350 килограми, за која Бугарската агенција за безбедност на храната (БАБХ) донела одлука да не ѝ дозволи влез на бугарскиот пазар. Јаболката ќе бидат вратени во земјава.
Од бугарската агенција информираат дека лабораториските испитувања утврдиле концентрации на пестициди над максимално дозволените законски граници, поради што производот не ги исполнува пропишаните стандарди за безбедност на храната.
Случајот е откриен при засилените инспекциски контроли на свежото овошје и зеленчук што се увезува во Бугарија, кои имаат за цел да ја проверат исправноста на производите пред нивното пуштање на пазарот.