Демир Капија е местото каде што во изминатите 24 часа паднало најголемо количество дожд, додека Попова Шапка утрово е најстудената локација во земјава. Ова го покажуваат најновите мерења на Управата за хидрометеоролошки работи (УХМР).
Според податоците измерени до 7 часот утрово, во Демир Капија наврнале 50 литри дожд на квадратен метар. Високи количества врнежи се регистрирани и во Гевгелија со 45 литри, Попова Шапка со 43, Крушево со 38 и Струмица со 34 литри на квадратен метар.
Во Кавадарци се измерени 27 литри, во Берово 24, а во Скопје-Петровец и Битола по 20 литри дожд на квадратен метар. Најмалку врнежи од наведените места се регистрирани во Крива Паланка и Куманово, по 8 литри.
Утринските температури, пак, се движеле од 1 степен на Попова Шапка, каде што било најстудено, до 13 степени во Гевгелија. Во Маврови Анови и Лазарополе биле измерени 4 степени, во Крушево 5, а во Крива Паланка и Берово 6 степени.
Во Скопје-Зајчев Рид утрово биле измерени 8 степени, додека во Скопје-Петровец 9 степени.
Врнежливото време ќе продолжи и во текот на денешниот ден, но според прогнозата на синоптичарите, дождот треба да престане кон крајот на денот. Ќе дува слаб до умерен северен ветер, кој повремено ќе засилува долж Повардарието.
Дневната температура ќе се движи од 10 до 14 степени.
Во Скопје се очекува облачно време со повремени врнежи од дожд со слаб до умерен интензитет. Ќе дува слаб до умерен северен ветер, а максималната температура ќе достигне 12 степени.