Суровата нафта Брент забележа пад на цената на околу 115 долари за барел, додека европските берзански индекси се со променливи вредности во очекување на извештаите за работењето на американските технолошки гиганти Microsoft, Alphabet, Amazon и Intel.
Цената на суровата нафта Брент падна за 1,48 проценти на 115,038 долари за барел, додека американската лесна сурова нафта WTI забележа пад од 1,96 проценти на 101,256 долари. Намалувањето доаѓа по претходниот скок од 6,2 проценти изминатата недела, откако дипломатските ангажмани во Блискиот Исток донесоа привремено олеснување на пазарот.
На берзата TTF во Амстердам, европските фјучерси за гас за ноември се тргуваа по цена од 94,375 евра за мегават-час.
Во однос на европските индекси, германскиот DAX порасна за 0,31 процент, францускиот CAC 40 за 0,61 процент, британскиот FTSE 100 за 0,41 процент, италијанскиот FTSE MIB за 0,61 процент, а московскиот IMOEX забележа раст од 0,32 проценти.
На берзата Форекс, еврото зајакна во однос на доларот и јенот. Вредноста на европската валута порасна за 0,10 проценти на 1,1228 долари, односно за 0,25 проценти на 176,15 јени. Индексот на доларот (DXY) се задржа на ниво од 101,80.
Цената на златото се искачи на 4.016,33 долари за тројанска унца, додека пченицата се тргуваше по цена од 6,2545 долари за бушел.
Тргувањето на американските берзи во петокот заврши во минус – Dow Jones падна за 1,23 проценти на 52.215,16 поени, S&P 500 се намали за 0,52 проценти на 7.623,68 поени, а Nasdaq за 0,21 процент на 25.955,34 поени.
Инвеститорите остануваат претпазливи и пред најавените состаноци на Федералните резерви на САД, ЕЦБ и Банката на Јапонија, од кои се очекува да ги задржат каматните стапки на истото ниво.