Претседателот на Општинската организација на СДСМ Штип, Павел Иванов, на прес-конференција изнесе низа обвинувања за работата на градоначалникот Иван Јорданов и локалната власт предводена од ВМРО-ДПМНЕ, оценувајќи го нивниот мандат како период на скандали, непотизам и зголемени трошоци за граѓаните.
Иванов посочи дека голем дел од ветените капитални проекти и понатаму остануваат нереализирани, додека цените на комуналните и општинските услуги бележат значителен раст.
Според изнесените податоци на прес-конференцијата, престојот во градинките е зголемен од 1.490 на 2.000 денари, годишниот билет за паркирање од 2.000 е покачен на 7.000 денари, а зголемување има и кај услугите за собирање смет и погребалните услуги.
Од СДСМ реагираат и на состојбите со јавните претпријатија и комуналната хигиена, посочувајќи на проблеми со водоснабдувањето, доцнење на платите во ЈП „Исар“, како и на одлуките за давање под закуп и продажба на општински имот. Како пример беа посочени Дино паркот и продажбата на хотелот „Гарни“.
Меѓу нереализираните проекти кои беа споменати на прес-конференцијата се паркот „Иднина“, обиколницата и резервоарот во населбата „Пребег“, мега-паркот во Света Недела, новата детска градинка, домот за стари лица, стационарот за бездомни кучиња, салата за боречки вештини и новиот студентски дом.
Иванов потсети и на низата кривични пријави што во изминатиот период беа во фокусот на јавноста, а се поврзуваа со лица блиски до градоначалникот, вклучувајќи ги случаите за кражба на нафта, кривичната пријава за директор на детска градинка, дивоградбата на секретарката на Општината и затворањето на ООУ „Гоце Делчев“.