ВМРО-ДПМНЕ оствари победа на локалните избори во Брвеница освојувајќи околу 3.000 гласови односно приближно 40% од поддршката, додека СДС освои 707 гласови или околу 9%, соопшти денеска портпаролот на партијата, Валентин Манасиевски.
Од партијата посочија дека ваквиот резултат претставува разлика од четири спрема еден во полза на ВМРО-ДПМНЕ, реагирајќи на прославата на раководството на опозицијата по објавувањето на резултатите.
„СДС декласиран во Брвеница 4 спрема 1, Филипче и неговите колеги слават како да дошле на власт“, истакна Манасиевски на прес-конференцијата.
Според ВМРО-ДПМНЕ, освоената поддршка за СДС во Брвеница е на пониско ниво во споредба со претходните локални изборни циклуси.
„Огромната поддршка која СДС ја доби од граѓаните на Брвеница е од досега невидени размери и е помала од минатите локални избори. Но, сепак Филипче и другарите тоа го прославија како успех“, рече тој.
Портпаролот на ВМРО-ДПМНЕ додаде дека рејтингот на опозициската партија е на ниско ниво и дека за нив Венко Филипче останува претседател на СДС.
„СДС со Филипче дојде до стадиум да се радуваат на 4 место на локални избори. Рејтингот им е минорен, кредибилитетот одамна им е изгубен, а никој освен пријателите на Заев, не му дава поддршка на Филипче. Но, сепак и покрај сите демократски правила и принципи, ние не сметаме дека Венко Филипче треба да си поднесе оставка. За нас, Филипче е најдоброто решение за претседател на СДС“, изјави Манасиевски.
Тој заклучи дека владејачката партија ќе продолжи со реализација на проекти и мерки во интерес на граѓаните.
„Се додека Филипче го води СДС по насока на Заев, граѓаните тоа ќе го препознаваат и ќе даваат огромна поддршка на ВМРО-ДПМНЕ, а ние ќе продолжиме и натаму да реализираме проекти и мерки во интерес на граѓаните“, нагласи Манасиевски.