ССМ: За да преживее, на едно семејство му треба над 70.000 денари месечно

На едно четиричлено семејство во октомври му се потребни најмалку 70.358 денари за основните месечни трошоци, покажува новата Синдикална минимална кошница на ССМ, која за еден месец е зголемена за 926 денари.

Најголем трошок и натаму се храната и пијалаците со 26.170 денари, додека за семејство кое живее во изнајмен стан од 60 квадратни метри вкупните месечни трошоци се искачуваат на 85.733 денари.

Паралелно, Министерството за економија и труд неодамна објави и сопствена пресметка на потрошувачката кошничка, според која на четиричлено семејство во август му биле потребни 58.475 денари месечно. За истиот месец, синдикалната кошница изнесуваше 68.675 денари, што значи дека двете пресметки се разликуваа за 10.200 денари, а само кај храната и пијалаците разликата беше околу 3.900 денари.

Од Министерството објаснија дека разликата произлегува од различната методологија и производите и услугите што се пресметуваат, при што во нивната кошничка не се вклучени трошоците за кирија или станбен кредит.