Републичкиот совет за безбедност на сообраќајот на патиштата (РСБСП) ја започнува едукативната кампања „Учам – Полагам – Возам“, наменета за средношколците од трета и четврта година кои се подготвуваат за полагање возачки испит.
Целта е младите навреме да се запознаат со условите за добивање возачка дозвола, но и со одговорностите што ги носи управувањето со моторно возило.
Од РСБСП посочуваат дека возачката дозвола не значи само поголема самостојност и слобода, туку и обврска за почитување на сообраќајните правила и грижа за безбедноста на сите учесници во сообраќајот.
Особено се нагласуваат ризиците од пребрзо возење, употреба на мобилен телефон зад воланот, некористење сигурносен појас и управување со возило под дејство на алкохол. Кај младите возачи, кои сè уште немаат доволно искуство, ваквото однесување може да доведе до сериозни последици.
Од Советот порачуваат дека целта не е младите само да научат да управуваат со автомобил, туку да изградат навики за одговорно и безбедно учество во сообраќајот.
Пораката на кампањата е: „Учи за да знаеш. Положи за да можеш. Вози за да стигнеш – безбедно“, со потсетување дека секој живот е важен.