Албанскиот премиер Еди Рама изјави дека неодамнешните протести во Тирана се користат за дестабилизација на земјата и попречување на процесот на преговори со Европската Унија, порачувајќи дека никој не може да ја собори владата со сила.
На состанокот со директорите на средните училишта во Министерството за образование, Рама оцени дека протестите не се поврзани со учениците и средношколците, иако во нив учествуваат и млади луѓе со екстремни политички ставови.
„Ова е напад кој е организиран во прецизно дефинирана рамка, извршен од обучени раце и кој е хранет од внатрешен оган, поттикнат од странски актери. Тоа е хибридна војна која функционира до таа мера“, нагласи Рама.
Тој ги отфрли обвинувањата за непропорционална употреба на сила од страна на полицијата, наведувајќи дека според неговите податоци се повредени околу 200 полицајци и 80 демонстранти. Рама додаде дека меѓу учесниците имало маскирани млади луѓе донесени од приградските населби за да ја нападнат полицијата и да предизвикаат страв.
„Камен во раката на лице кое го фрла кон полицијата е оружје. Овој бран на насилство мора да се запре“, рече Рама, истакнувајќи дека почувствувал голема загриженост од сцените на улиците.
Албанскиот премиер упати критики и до дел од медиумите за начин на известување кој, според него, служи на политички и економски интереси.
„Се прави сè за да се претвори општествената загриженост во гнев, за да може владата да биде соборена, што никогаш нема да се случи“, рече тој.
Рама истакна дека владата е отворена за дијалог со секој што нуди политичка алтернатива.
„Владата и јас сме подготвени за дијалог со секого. Нека дојдат кај мене лице в лице и нека ми кажат дека треба да си заминеме, дека имаат поинаков пристап, поинаква програма. Подготвен сум да го сослушам секого, каде било, безусловно“, рече Рама.
Како реакција на немирите, тој најави нов пакет административни мерки кои вклучуваат финансиска одговорност за родителите на малолетните прекршители, разгледување на можноста за намалување на возраста за кривична одговорност, ограничување на социјалните мрежи за деца под 16 години, како и санкции за онлајн закани и поттикнување насилство.