Градоначалникот на Општина Битола, Тони Коњановски, денеска присуствуваше на свеченоста по повод јубилејот 65 години од основањето на Техничкиот факултет во Битола, кој функционира во рамките на Универзитетот „Св. Климент Охридски“.
Факултетот веќе шест и пол децении претставува столб на едукацијата, техничката мисла и науката во регионот и државата.
На свеченоста по повод јубилејот се обратија ректорот на Универзитетот, проф. д-р Игор Неделковски, деканот на факултетот, проф. д-р Митко Костов, како и градоначалникот Коњановски.
„Овој јубилеј е заеднички успех на сите генерации студенти, професори и деловни партнери кои помогнаа во градењето на современиот инженерски кадар, а соработката со Oпштина Битола е на високо ниво и со техничкиот факултет и воопшто со Универзитетот ’Св. Климент Охридски‘. И во оваа прилика сакам да ја истакнам една од работите со која бевме пионери во Македонија, а тоа е универзитетската летна пракса која студенти од факултетите на битолскиот универзитет во текот на летните месеци ја спроведуваат во Oпштина Битола и нашите јавни претпријатија, а потоа овој пример го следеа и други градови“, истакна градоначалникот на Битола.
Коњановски им го честиташе големиот јубилеј на студентите, наставниот кадар и сите вработени, посакувајќи им уште многу успешни академски години.
„Битола е горда со науката која шест и пол децении го гради нашето општество“, заклучи тој.