Вицепремиерот и министер за транспорт Александар Николоски, во гостувањето во емисијата „Само интервју“ на ТВ Канал 5, најави реконструкција, надградба и електрификација на железничката пруга од Велес до Битола преку програмата ИПА 3 на Европската Унија.
Како што информираше Николоски, делницата веќе е вклучена во ИПА 3, а програмата се очекува да биде усвоена до крајот на годината и да започне со спроведување од 1 јануари. По усвојувањето ќе следуваат тендерска постапка, избор на изведувач и реализација на проектот.
„Велес – Битола влезе како приоритет. Таму одиме со реконструкција, надградба и многу важно, електрификација“, истакна Николоски, посочувајќи дека електрификацијата ќе овозможи поекономичен и поеколошки железнички транспорт.
Во гостувањето, Николоски најави и набавка на нови локомотиви и патнички возови. Според него, со Европската банка за обнова и развој е договорена набавка на најмалку пет електрични локомотиви, додека е во завршна фаза договорот со Светската банка за набавка на пет до седум патнички гарнитури.
Дополнително, како што најави вицепремиерот, Македонски железници – Транспорт планира со сопствени средства да набави уште два воза во текот на следната година.
„Ќе имаме девет нови воза во следните две до три години и пет нови локомотиви“, изјави Николоски во емисијата „Само интервју“ на ТВ Канал 5.