Возачите во Хрватска наскоро ќе се соочат со значително построги сообраќајни казни, според новите измени на Законот за безбедност на сообраќајот на патиштата што ги презентираше хрватскиот министер за внатрешни работи, Давор Божиновиќ. За најтешките прекршоци се предвидени казни и до 5.000 евра, како и можност за затворска казна.
Најстрогите санкции се предвидени за организирање и учество во нелегални улични трки и опасно изведување маневри. Казните за ова дедење се движат од 2.000 до 5.000 евра, а вклучуваат и затворска казна до 60 дена, привремено одземање на возилото и забрана за управување. Санкции ќе има и за снимањето и објавувањето на ваквите опасни маневри на сообраќајните мрежи.
„Јавните патишта не се тркачки патеки, а безбедноста на граѓаните не е место каде некој може да се докаже. Оние кои сакаат да се тркаат, за тоа има патеки“, истакна Божиновиќ, додавајќи дека МУП нема ништо против ентузијастите за автомобили, туку против оние кои ги загрозуваат другите.
Построги правила се воведуваат и за користењето на електричните тротинети. Родителите или старателите кои ќе им дозволат на деца под 14 години да управуваат со тротинет се соочуваат со глоба од 1.000 до 3.000 евра. Казната за возење без заштитна кацига и за неправилно движење се зголемува на 100 евра, а се воведува и задолжителна регистрација.
„Тротинетот не е играчка и може да предизвика сериозни повреди, па дури и смрт. Родителската одговорност не завршува со купувањето на тротинетот, туку само почнува“, рече министерот.
Со измените се предвидува и казна од 300 евра за опасно паркирање со кое се загрозува сообраќајот или се блокираат пристапите за итните служби и лицата со попреченост. Казната за некористење сигурносен појас и за неправилно превезување деца се покачува од 130 на 200 евра.
Законот исто така се усогласува со европските правила за прекугранична размена на податоци за прекршоци, со цел изречените казни да се наплаќаат без разлика од која земја доаѓа возачот.
„Нашата цел не е да собираме повеќе казни, туку да имаме помалку сообраќајни несреќи и помалку повреди“, заклучи Божиновиќ, посочувајќи дека минатата година на хрватските патишта загинале 261 лице.