Измамници кои се претставувале како вработени во грчкиот оператор за дистрибуција на електрична енергија ХЕДНО успеале да измамат три жени од побогатите предградија на Атина за само 24 часа, одземајќи им пари и накит во вредност од над 600.000 евра, соопшти грчката полиција.
Сторителите ги плашеле жртвите со предупредувања за наводен ризик од пожар, струен удар или прекин во снабдувањето поради долг. Портпаролката на грчката полиција, Констанција Димоглиду, изјави дека осомничените го повторуваат истиот модел на измами за да ги добијат парите и накитот од своите жртви.
За само еден ден, две жени од престижното атинско предградие Психико станале мета на измамата. Во едниот случај, измамниците изнудиле пари и накит вредни околу 100.000 евра, додека во вториот ја убедиле жртвата да им ги предаде вредностите поради наводен долг за струја.
Третата жртва била 89-годишна жена од предградието Марусија. Откако дознале дека ги чува парите скриени во ѕидот на една соба, измамниците со чекан го скршиле ѕидот и однеле 20.000 евра во готовина.
Грчката полиција информираше дека во текот на изминатата недела се уапсени осум лица осомничени за учество во криминална организација со сличен начин на делување. Групата изнудила повеќе од 800.000 евра во 22 регистрирани случаи на измама.
Полицијата апелира до граѓаните да не предаваат пари или накит на непознати лица и секогаш да го проверуваат идентитетот на наводните теренски работници преку официјалните канали на операторите.