Членот на Извршниот одбор на СДСМ, Андреј Жерновски, на денешната прес-конференција изјави дека пуштањето на Ива Михаилова преку македонската граница е договорена работа и мегаскандал што бара итна институционална разрешница и политичка одговорност.
Според Жерновски, јавноста сега гледа што всушност договарал министерот Муцунски за време на неговата посета во Софија. Тој истакна дека Михаилова слободно ја напуштила земјата иако судот ѝ ги одзел пасошите, додека МВР тврди дека нема евидентиран излез.
– МВР вели нема евидентиран излез, што дополнително кажува дека сето ова е договорен и монтиран случај – рече Жерновски, нагласувајќи дека министерот за внатрешни работи Панче Тошковски мора веднаш да си поднесе оставка за да не влијае врз истрагата.
Од опозициската партија инсистираат надлежните институции веднаш да поведат постапка за екстрадиција на Михаилова, барајќи одговорност за сите лица кои овозможиле нејзино заминување и кршење на судските одлуки.