Општина Гевгелија реализира и продолжува со повеќе инфраструктурни, образовни и комунални проекти, со кои, според ВМРО-ДПМНЕ, се подобруваат условите за живот на граѓаните и се поттикнува локалниот развој.
Меѓу позначајните проекти се обновата на фасадите и уредувањето на Старата чаршија, реконструкцијата на улицата „Маршал Тито“ и обновувањето на спортската сала ДТВ „Партизан“. Во употреба е пуштена и новата градинка „Сончогледи“, со капацитет за дополнителни 140 деца.
Во повеќе населени места се реконструирани и асфалтирани улици, а се инвестира и во водоводната мрежа и канализацијата. Нови урбани паркови се изградени во Гевгелија и Миравци, додека паркот во Негорци е во завршна фаза.
Општината вложува и во образованието. Учениците во основните училишта добиваат бесплатни униформи, а училиштата се опремуваат со клима-уреди, паметни табли, компјутери и прочистувачи на воздух. Во ООУ „Владо Кантарџиев“ е опремена и сензорна соба за деца со попреченост.
Отворен е и Дневен центар за стари лица со капацитет од 50 корисници, наменет за социјални, културни, рекреативни и здравствено-превентивни активности.
Во економскиот дел, во Гевгелија се реализирани инвестиции во Mega Shopping Park и Gevgelija Mall со Vero Jumbo, за кои се наведува дека отвораат нови содржини и повеќе од 400 работни места.
Меѓу планираните проекти е и уредувањето на зелената површина кај Сува Река, на околу 25.000 квадратни метри. Во рамки на еколошката акција „Да пуштиме корени во Гевгелија“ досега се засадени 14.000 чемпреси.
Во завршна фаза е и реконструкцијата на старата училишна зграда во Серменин, која треба да се адаптира во туристички информативен центар и простор за настани. Предвидена е и велосипедска патека долга 1.005 метри до манастирот „Св. Илија“.
Од ВМРО-ДПМНЕ оценуваат дека проектите во инфраструктурата, образованието, животната средина и социјалната заштита придонесуваат за развојот и модернизацијата на Гевгелија.