По синоќешното приведување на обвинител од Вишото јавно обвинителство во Битола, истрагата продолжува, а од Обвинителството за гонење организиран криминал и корупција за денеска се најавени повеќе детали за случајот.
Обвинителот бил приведен во Прилеп, а полицијата со судски наредби извршила претреси во неговиот дом и во службените простории на Вишото јавно обвинителство во Битола.
Официјално, тој е осомничен за кривично дело „примање награда за противзаконито влијание“. Неговото име засега не е соопштено, ниту пак за колкава сума станува збор
Случајот се поврзува со постапката во која на битолскиот бизнисмен Борче Марковски му беше вратен претходно одземениот пасош. Од МВР за дел од медиумите било потврдено дека приведувањето е поврзано со постапувањето околу патната исправа на Марковски.
Пред два месеца Јавното обвинителство објави дека обвинител од Основното јавно обвинителство Струга на 15 јуни дал негативно мислење за барањето на одбраната на Марковски да му биде вратен пасошот.
По ново барање на одбраната, предметот бил рефериран во Вишото јавно обвинителство во Битола. Оттаму било наложено понискиот обвинител да даде позитивно мислење за враќање на патната исправа, со образложение дека гаранцијата ги исклучувала околностите кои укажуваат на опасност од бегство.
Потоа Основниот суд во Струга му го вратил пасошот на Марковски, кој замина во Србија. Неговата одбрана тогаш тврдеше дека станува збор за деловно патување и дека Марковски ќе се врати во земјава, а на 1 август адвокатот соопшти дека тој повторно е во Битола.
Марковски е првообвинет во предмет за злоупотреби со јавна набавка во РЕК „Битола“, вредна над 1,7 милиони евра. Претходно излезе од притвор со гаранција вредна повеќе од пет милиони евра.
Обвинителството засега не открива каква награда наводно била примена, од кого и за какво конкретно влијание. Од ОЈО ГОКК најавија дека повеќе информации ќе соопштат по завршувањето на истражните дејствија.