Дванаесетгодишно девојче е убиено во вооружен инцидент меѓу двајца мажи за кои се сомнева дека се расправале за паркинг-место во парк во Балтимор, Мериленд, каде што во тој момент се одржувал младински фудбалски натпревар, соопшти полицијата.
Полициските службеници пристигнале во паркот Леон Деј, каде што ги пронашле девојчето и една жена со прострелни рани, објавува АП. Двајца мажи подоцна се појавиле во блиските болници барајќи медицинска помош, изјави началникот на полицијата во Балтимор, Ричард Ворли, на прес-конференција. Девојчето починало во болница, додека повредите на тројцата возрасни не биле опасни по живот.
Според полицијата, мажите отвориле оган еден кон друг за време на расправијата, а девојчето не било директна цел на нападот.
– Знаеме дека имало некаков вид расправија меѓу двајцата мажи. Двајцата мажи пукале еден кон друг, а во вкрстениот оган, 12-годишно девојче, кое веројатно било во паркот и го гледало натпреварот, било убиено – рече Ворли, додавајќи дека сè уште не се знае бројот на испукани истрели.
Полицијата трага по најмалку двајца осомничени и апелира до сите сведоци да се јават во надлежните служби. Градоначалникот на Балтимор, Брендон Скот, огласувајќи се за трагедијата, изјави:
– Двајца возрасни мажи се скараа, а сега 12-годишно девојче го нема. Никогаш не треба да кажеме нешто такво. Она што се случи денес е едно од најгрозоморните нешта што сум ги видел во мојот живот – рекол Скот.