Денеска, 22 септември, православните верници ги одбележуваат Светите праведни Јоаким и Ана, родителите на Пресвета Богородица. Празникот е посветен на семејството, родителството и молитвата за рожба, а Светите Јоаким и Ана се меѓу најпочитуваните светители на кои верниците им се обраќаат со молитви за потомство и семејна благосостојба.
Според христијанското предание, Јоаким и Ана долго време немале деца, но во поодмината возраст ја добиле ќерката Марија, која подоцна станала Пресвета Богородица. Поради нивната приказна, празникот има особено значење за брачните парови кои се молат за рожба.
На овој ден, верниците традиционално одат во црква, палат свеќа и се молат за здравје, мир и слога во семејството. Во домовите каде што празникот се одбележува како слава, се подготвува празнична трпеза.
Еден од обичаите поврзани со празникот е и дарувањето. Во спомен на Светите Јоаким и Ана, се верува дека денот треба да се одбележи со помагање некому кој има помалку од нас – скромно и без гордост, со мислата дека оној кому му се дава милостина е подобар од нас.
Празникот потсетува на важноста на семејството, благодарноста, милосрдието и помагањето на оние на кои им е потребна поддршка.