Сеќавањата се дел од она што нe прави тоа што сме, лицата што ги сакаме, местата каде што сме растеле, моментите што никогаш не сакаме да ги заборавиме. Но, за луѓето кои живеат со Алцхајмерова болест, овие спомени постепено почнуваат да исчезнуваат. Болеста не го менува само животот на пациентот, туку и на целото семејство кое секојдневно се соочува со нови предизвици.
Во Македонија, повеќе од 24 илјади лица живеат со деменција, а околу 10 илјади со Алцхајмерова болест. Состојба која не влијае само врз пациентите, туку и врз нивните семејства и најблиски.
Во нашата држава не постојат специјализирани домови за лица со деменција. Приватните сместувачки капацитети се скапи и далеку од пристапни за џебот на просечен Македонец.
Во моментов нема лек за деменција. Во последните две години има напредок во однос на третманот на Алцхајмеровата болест. Има два одобрени лека во Европа и САД кои успеваат да ја успорат прогресијата на болеста.
„Тоа значи на 10 години уште три години подобар квалитет на живот. Меѓутоа за да се даде таа терапија која се надевам ќе биде достапна и во земјата треба болеста да се дијагностицира многу рано“, додаде професор Новотни.
Клучно е болеста да се забележи во ран стадиум. Секој кој заборава работи кои се случиле во скоро време, повторува работи што веќе ги раскажал, и забележува знаци на растојство да се консултира со лекар.
Денеска, на 21 септември, се одбележува Светскиот ден на Алцхајмеровата болест, со цел да се подигне свеста за предизвиците со кои се соочуваат заболените лица и нивните семејства.