Уставниот суд, во соработка со Германската фондација за меѓународна правна соработка (ИРЗ), денеска и утре во Охрид ќе биде домаќин на регионална конференција посветена на прашањето „Како да се зголеми довербата на јавноста во уставните судови“.
Главен фокус на конференцијата ќе биде јакнењето на јавната доверба во уставното судство, со акцент на независноста и кредибилитетот на уставните судови, транспарентноста, комуникацијата со јавноста и предизвиците што ги носи забрзаниот развој на информациските и технолошките процеси.
Преку размена на искуства од регионот и Европа, учесниците ќе дискутираат за начините на кои уставните судови ја градат и одржуваат довербата кај граѓаните, притоа зачувувајќи ја својата независност и институционален авторитет.
Конференцијата ќе ја отворат претседателот на Уставниот суд, Дарко Костадиновски, и Штефан Пирнер, раководител на проектниот оддел за Западен Балкан при ИРЗ.
Во рамки на панел-дискусиите ќе учествуваат претседатели и судии на уставните судови од регионот. Меѓу учесниците се претседателот на Уставниот суд на Босна и Херцеговина, Мирсад Ќеман, како и судиите на Уставниот суд на Северна Македонија, Татјана Васиќ-Бозаџиева и Осман Кадриу. На конференцијата ќе учествуваат и претставници на уставните судови на Црна Гора и Србија.
Свое излагање ќе има и Winfried Schubert, поранешен претседател на Уставниот суд на сојузната покраина Бранденбург и поранешен претседател на Вишиот покраински суд во Наумбург, Германија. Тој ќе се осврне на развојот и улогата на германското уставно судство, неговата јавна прифатеност, актуелните предизвици и институционалната отпорност.
На конференцијата се очекува присуство и на претставници на ИРЗ, дипломатскиот кор, академската заедница и судството.