Со инвестиција од 2,7 милиони евра заврши модернизацијата на аеродромот „Св. Апостол Павле“ во Охрид, каде што е реконструиран патничкиот терминал, проширен е чек-ин просторот, зоните за безбедносна контрола и рачен багаж, а зголемен е и бројот на шалтери.
На официјалното пуштање во употреба, премиерот Христијан Мицкоски истакна дека со преземените активности значително се подобрува квалитетот на услугите за сите корисници.
Со ова охридскиот аеродром добива поинаква динамика, поинакво светло поинаков квалитет и убеден сум дека во периодот којшто следи бројот на патниците, но и бројот на компаниите коишто ги користат услугите на охридскиот аеродром ќе се зголемува. Оваа година се бележат рекорди на охридскиот аеродром „Св. Апостол Павле“. Имаме ден со најголем број патници досега во историјата — повеќе од 3.000 . А исто така има и денови кога имаме повеќе од 20 полетувања, што исто така претставува само по себе еден значаен податок којшто е за почит. Убеден дека во периодот којшто претстои со сите градежни активности и поддршката којашто ја даваме како Влада, овие бројки ќе се дуплираат, ќе се триплираат и ќе дојдеме до бројки коишто претставуваат наш нов таргет, рече Мицкоски.
Вицепремиерот и министер за транспорт Александар Николоски посочи дека по завршувањето на градежните работи практично се отвора нов терминал, потсетувајќи дека претходните поголеми зафати датираат уште од 1970 година.
Охридскиот аеродром само од јануари до јуни оваа година има над 240.000 патници, а двата аеродроми оваа година заедно ќе се приближат до 4 милиони, нешто што беше незамисливо за нашите аеродроми, и ќе продолжиме да растеме – рече Николоски.
Тој додаде дека се интензивираат и работите на автопатот Кичево – Охрид, посочувајќи дека делот до аеродромот е веќе завршен.
Најтешката делница ќе се отвори во следните месеци. Очекувам во текот на првото полугодие од следната година да се отвори целиот автопат, а секако продолжуваме и на работа на останатите делници коишто треба да значат поврзување и со Скопје и со скопскиот аеродром – најави Николоски.
Извршниот директор на ТАВ Македонија, Серкан Каптан, нагласи дека целата инвестиција била реализирана без прекин на редовниот авиосообраќај, дополнувајќи дека вкупните вложувања на компанијата во земјава достигнале речиси 300 милиони евра.
Во овој период, ја зголемивме поврзаноста и годишниот сообраќај за повеќе од четири пати. Во 2026 година, македонските аеродроми се меѓу најбрзорастечките аеродроми во Европа. Постигнавме раст од речиси 30 проценти во споредба со претходната година. Охридскиот аеродром го забележа најуспешниот јули во својата историја, поставувајќи нови рекорди и во бројот на патници и во бројот на реализирани летови – рече Каптан.