Најмалку 21 лице загина, а повеќе се повредени во тешка сообраќајна несреќа што се случи на островот Фого на Зеленортските Острови, откако автобус со ученици излетал од патот и паднал во провалија длабока околу 30 метри.
Несреќата се случила синоќа на патот меѓу Ча дас Калдеирас и Кампанас де Сима, во северниот планински дел на општината Сао Филипе.
Автобусот, кој ги враќал децата од излет, излетал од коловозот и паднал во стрмна и карпеста провалија, што дополнително ги oтежнало спасувачките операции на терен.
Според локалните власти, повеќето од патниците биле млади луѓе и ученици од средните училишта од областите Курал Гранде и Понта Верде. Меѓу загинатите на лице место е и возачот на автобусот.
При падот, најмалку десет патници биле исфрлени од возилото, додека дел од нив останале заглавени во уништениот автобус.
Локалните образовни власти појаснија дека патувањето не било во организација на училиштата.
Според нивните информации, станувало збор за приватна активност која возачот традиционално ја организирал секоја година за учениците кои ги превезувал во текот на учебната година.
Повеќе од десет повредени лица итно биле примени во Ургентниот центар на Регионалната болница „Сао Франциско де Асис“ во Сао Филипе, каде што дел од нив се наоѓаат во тешка здравствена состојба. Медицинскиот персонал е целосно мобилизиран, а дел од повредените се упатени и во приватна клиника за дополнителни прегледи.