Создавањето услови младите инженери својот ум, талент и креативен потенцијал да ги реализираат во татковината е стратешка цел од која зависат развојот и опстанокот на државата, порача денеска претседателката Гордана Сиљановска-Давкова на свеченоста за доделување на признанието „Инженерски прстен 2026“ во Охрид.
На 23-то издание на традиционалната манифестација, престижното признание им беше доделено на 14 млади инженери кои постигнаа најуспешни резултати за време на студирањето.
Истакнувајќи го значењето на младите кадри за економскиот и технолошкиот напредок, Сиљановска-Давкова нагласи:
– Мора да станеме свесни дека во време кога знаењето е најзначаен развоен ресурс, од односот на одговорните и на најповиканите кон најучените, најталентираните и најкомпетентните млади луѓе зависи просперитетот на нашата држава, рече Сиљановска-Давкова.
Претседателката додаде дека успешните студенти претставуваат непроценлив социјален капитал.
– Од нашата способност, подготвеност и решеност да ги препознаеме и идентификуваме, но и навреме да ги вреднуваме, овозможувајќи им својот професионален потенцијал да го реализираат тука, дома, зависат нашата технолошка конкурентност и компетитивност, но и економскиот капацитет и развој на државата, рече претседателката.
Зборувајќи за придонесот на инженерството во општеството, таа оцени:
– Најголемите историски пресврти и општествени скокови не се врзани само за нови научни сознанија, туку и за способноста и подготвеноста за нивно преточување во конкретни решенија со кои темелно и трајно се менуваат начинот на живот, производството и комуникацијата. Преку инженерството научната мисла добива апликативна, општествена верификација и релевантност, рече таа.
Порака до младите упати и претседателот на Инженерската институција на Македонија, Андреј Лепавцов, кој ги повика да останат во земјата и да учествуваат во големите инфраструктурни и дигитални проекти.
– Останете во земјата. Знаете дека сте ни потребни. Потребен ни е вашиот ум за да ги проектираме, изведеме и завршиме големите стратешки проекти што ќе ги дефинираат нашите следни десет години, рече Лепавцов, додавајќи дека „вистинската независност не е само политички статус, таа се гради преку економска сила и технолошка самодржливост“.
Претседателот на Комората на овластени архитекти и овластени инженери, Дејан Метикош, исто така истакна дека на младите мора да им се овозможи постојано усовршување и градење кариера во домашни услови.
– Дипломата повеќе не е крај на образованието, туку почеток на професионалното учење. Нашата задача е да создадеме услови инженерите постојано да се усовршуваат, да следат современи стандарди и технологии и да ја градат својата професионална кариера во нашата држава. Ако сакаме современа држава, мора да имаме и современо инженерство, нагласи Метикош.