Околу 2.000 ученици и наставници во Индонезија за само неколку дена пријавиле здравствени проблеми откако консумирале храна обезбедена преку државната програма за бесплатна училишна исхрана (МБГ). Локалните власти започнаа истрага за да се утврди точната причина за масовното разболување.
Најновиот случај е регистриран во средно училиште во Ласем, во провинцијата Централна Јава, каде што по оброкот послужен во средата, симптоми пријавиле 777 ученици и наставници.
Кај голем дел од нив се појавила дијареја, што предизвикало сериозни проблеми во санитарните простории, по што наставата била прекината. Раководството одлучило да испрати дома речиси 1.200 ученици и 95 вработени, а неколку лица поради состојбата биле пренесени во болница.
Директорката на училиштето изјавила дека трошоците за лекувањето ќе бидат покриени од државата, а во објектот пристигнал и локалниот дистрибутер за да ја преземе одговорноста.
Само еден ден претходно, сличен инцидент беше забележан во исламски интернат во Сидоаржо, во провинцијата Источна Јава, каде што 730 лица се разболеле по консумирање на оброците од истата програма.
Локалните власти зедоа примероци од храната за лабораториска анализа за да утврдат дали станува збор за контаминација, грешка при подготовката, складирањето или дистрибуцијата.
Директорот на Националната агенција за исхрана на Индонезија порача дека, доколку истрагата покаже дека имало небрежност или дека се исполнети услови за постоење кривично дело, одговорните лица ќе мора да сносат последици.
Институциите продолжуваат да ја следат состојбата на заболените, а конечната причина за масовното труење ќе се знае по завршувањето на лабораториските испитувања.