Младиот кошаркарски тренер Антонио Савески од Охрид е возачот кој го загуби животот во тешката сообраќајна несреќа што синоќа се случи на магистралниот пат Охрид-Кичево, пренесе спортспорт.мк.
Савески имаше 33 години и беше добро познат во македонската кошарка, особено по својата долгогодишна работа со младинските категории.
Според информациите од полицијата, сообраќајната несреќа била пријавена во СВР Охрид синоќа во 23:30 часот. Возилото „хјундаи гец“ со охридски регистарски ознаки најпрво удрило во кучиња скитници, а потоа и во металните заштитни браници покрај патот, по што се запалило.
На местото на настанот веднаш интервенирала екипа на Територијалната противпожарна единица Охрид која го изгаснала пожарот, при што во опожарениот автомобил било пронајдено телото на починатиот возач.
По наредба на јавен обвинител, телото е предадено на Судска медицина за обдукција. Додека траел увидот од страна на полицијата и обвинителот, сообраќајот на магистралата бил пренасочен преку регионалниот пат Охрид-Струга.
Антонио Савески последниот тренерски ангажман го имаше во КК Ангели, а во кариерата работеше и во екипите на Вардар, Водно Санс и Охрид.