Седмиот ден од протестите во албанската престолнина Тирана беше одбележан со жестоки судири меѓу демонстрантите и полицијата, а ситуацијата ескалираше неколку пати во текот на денот, објави Botasot.info.
Демонстрантите фрлаа камења и молотови коктели, додека безбедносните сили одговорија со солзавец, водени топови и гумени куршуми. Протестите започнаа на 13 октомври од страна на студентите, а потоа им се придружија и бројни граѓани. Митингот кој започна мирно, прерасна во насилни судири и напади врз државни институции.
Ескалација се случи околу 13 часот пред Министерството за образование кога демонстрантите почнаа да фрлаат камења, по што полицијата употреби водни топови. Околу 14 часот маскирана група ја нападна и зградата на Апелациониот суд во Тирана, при што беа скршени врати и прозорци, а дел од нив влегоа во објектот додека внатре имало вработени. Регистриран беше и напад врз Министерството за внатрешни работи со молотови коктели, поради што во близина на кабинетот на премиерот Еди Рама беа распоредени специјалните единици РЕНЕА.
Поранешниот пратеник на Демократската партија, Ервин Салјани, за телевизијата News24 изјави дека премиерот Еди Рама е сè повеќе изолиран.
„Граѓаните го доведоа Рама во состојба на голема осаменост. Тој е изолиран, поделен во своето гето и веќе е презрен во меѓународните кругови. Бунтот го лиши од легитимитет. Народот повеќе не може да го толерира Рама како премиер“, рече Салјани, додавајќи дека „Рама отиде предалеку и верувам дека граѓаните ќе успеат да го соборат. Граѓаните го зедоа суверенитетот во свои раце“.
Потоа реагираше и американскиот сенатор Гари Питерс, кој апелираше за смирување на тензиите.
„Длабоко сум загрижен за ескалацијата на ситуацијата во Албанија. Локалните власти мора да се воздржат од агресија врз мирните демонстранти, а сите на терен мора да работат на смирување на ситуацијата и спречување на понатамошно насилство“, рече сенаторот, истакнувајќи дека „Албанскиот народ заслужува влада што ги почитува нивните основни права и владеењето на правото. Затоа ќе продолжам да се залагам за мир и правда за сите Албанци“.