Вицепремиерот и министер за транспорт Александар Николоски информираше дека Градот Скопје и повеќе општини во земјава добиваат 49 нови возила и специјализирана опрема за подобрување на комуналната хигиена, преку проект реализиран со поддршка од Светската банка.
Николоски појасни дека набавката е реализирана со неискористени финансиски средства од повеќегодишниот проект со Светска банка, чија примарна намена е ревитализација и изградба на локални и регионални улици.
„Како Влада и Министерство имаме проект со Светската банка кој што трае неколку години. Проектот опфаќа ревитализација и за изградба на нови локални и регионални улици низ сите општини во државата. Дополнително, во склоп на тој проект, заради останати неискористени финансии, одлучивме на општините во Македонија да им помогнеме со една ваква набавка со што ќе допринесеме до зголемување на нивото на хигиената во општините во Македонија“, изјави Николоски.
Набавената механизација вклучува 19 мултифункционални камиони, девет специјализирани цистерни и 21 возило за чистење улици, наменети за Скопје, Куманово, Прилеп, Охрид, Тетово, Неготино, Кичево, Дебар и Велес, а најавени се опреми и за останатите општини.