Градоначалникот на Општина Гази Баба, Бобан Стефковски, изрази задоволство од денешната набавка на повеќе од 30 нови возила за ЈП „Комунална хигиена“, истакнувајќи дека со овој чекор се воспоставува модерен и ефикасен систем за одржување на хигиената во Скопје.
Стефковски направи споредба со изминатиот период, посочувајќи дека за 12 години биле набавени само 10 возила, додека сега, за една година со поддршка од Владата и новото раководство на Градот Скопје, возниот парк значително се обновува.
„Тоа не се само бројки. Тоа се нови капацитети. Тоа значи подобра услуга и почист град. Од целосно девастиран систем, со посветена работа, сериозен пристап и силна институционална поддршка, системот повторно се става во функција“, изјави Стефковски.
Тој нагласи дека проектот е од посебна важност за жителите на Гази Баба и најави дека наскоро ќе бидат промовирани уште пет нови возила и 3.300 нови контејнери кои ги набавува Градот Скопје.
Градоначалникот упати благодарност до Владата, премиерот Христијан Мицкоски, министерот за транспорт Александар Николоски, Градот Скопје, претседателот на ЗЕЛС Орце Ѓорѓиевски и Светска банка за поддршката во реализацијата на овој проект.