Секој петти адолесцент на возраст од 12 до 17 години во изминатите 12 месеци бил изложен на сексуално вознемирување или друг облик на злоупотреба на интернет, покажуваат најновите податоци од глобалното истражување на УНИЦЕФ.
Истражувањето, во кое биле опфатени 21.000 млади корисници од 21 држава — вклучително и од Македонија, Србија и Црна Гора — го разбива митот дека анонимните профили се најголемата закана.
Податоците откриваат дека во дури 57 отсто од случаите сторителот му бил претходно познат на детето (пријател, роднина или партнер). Само 16 отсто од нападите потекнувале од целосно непознати лица, додека во 27 отсто од случаите идентитетот останал неутврден.
Социјалните мрежи како „Фејсбук“, „Инстаграм“, „ТикТок“, „Снепчет“, „Ватсап“ и „Јутјуб“ се местото каде што се случуваат 60 отсто од сите регистрирани случаи, додека 14 отсто од злоупотребите се забележани преку онлајн видеоигрите.
Од УНИЦЕФ предупредуваат дека загрижувачки голем број од жртвите — дури 41 отсто — никогаш никому не го пријавиле инцидентот. Оние што побарале помош, главно се обратиле кај пријатели, блиски роднини или кај мајките.
За заштита на малолетниците, организацијата апелира до владите и технолошките гиганти за подобрување на приватните поставки, зајакнување на законите и воведување строги механизми за пријавување. Дел од државите веќе преземаат чекори, како Австралија која воведе старосна граница од 16 години за користење социјални мрежи.