Организираниот криминал во затворите е поширок безбедносен и институционален проблем кој бара заедничко дејствување на повеќе институции, порача министерот за внатрешни работи Панче Тошковски на регионална конференција во Скопје.
Тој предупреди дека криминалните структури можат да продолжат да комуницираат, да влијаат и да ги одржуваат своите мрежи и по лишувањето од слобода, што може да го наруши интегритетот на институциите и ефикасноста на кривичната правда.
Како ризици Тошковски ги посочи пренатрупаноста, начинот на примена на притворот, недоволно развиените алтернативи, можноста за регрутирање ранливи лица и коруптивното влијание врз затворскиот персонал.
Според него, неопходни се јасни професионални стандарди, механизми за спречување корупција и подобра размена на информации меѓу затворските служби, полицијата, обвинителството и другите надлежни институции.
Тошковски оцени дека регионалната соработка е особено важна бидејќи транснационалните криминални мрежи и коруптивните ризици не познаваат државни граници.
Конференцијата „Организиран криминал во затвори: Зајакнување на интегритетот, разузнавањето и соработката во Југоисточна Европа“ е организирана од Мисијата на ОБСЕ во Скопје.