Министерот за надворешни работи и надворешна трговија, Тимчо Муцунски, денеска и утре престојува во Блед, Словенија, каде што учествува на овогодинешниот Бледски стратешки форум.
На настанот, кој се одржува под мотото „Моќта да ја обликуваме иднината“, Муцунски ќе се обрати на една од клучните панел-дискусии.
„Овогодинешниот форум се одржува под мотото ‘Моќта да ја обликуваме иднината’ и претставува важна платформа за размена на ставови за иднината на регионот, Европа и светот. Во рамките на форумот ќе бидам говорник на панел-дискусијата ‘Геополитички превирања: Централна и Југоисточна Европа во свет на коридори, безбедност и проширување’, посветена на геополитичките трансформации што ги редефинираат меѓународните односи“, истакна Муцунски.
Во рамките на форумот се предвидени повеќе билатерални средби и дискусии посветени на актуелните геополитички и безбедносни предизвици, регионалната соработка и европската перспектива.