Стабилното и топло време во следните неколку дена во попладневните часови ќе биде нарушено со развој на нестабилност и појава на локално невреме во повеќе региони од земјава, соопштуваат од УХМР.
Во среда и четврток времето ќе преовладува сончево и топло, но попладне се очекува зголемување на нестабилноста во атмосферата.
Поради акумулираната енергија, на одделни места временските процеси може да прераснат во невреме проследено со интензивен пороен дожд, силен ветер и можност за појава на град.
Промените во времето ќе го зафатат и главниот град. Во Скопје во среда и четврток наутро и претпладне ќе биде сончево и топло, додека во попладневните часови се очекуваат пороен дожд, грмежи и засилен ветер.
Од УХМР предупредуваат дека во одделни делови од Скопската Котлина временските процеси може да бидат поинтензивни и да добијат карактер на невреме, проследени со пороен дожд, силен ветер и услови за појава на град.
Надлежните апелираат до граѓаните во попладневните часови да бидат внимателни и редовно да ги следат најновите информации и предупредувања од институциите.