Американскиот претседател Доналд Трамп денес изјави дека нафтата од неодамна склучениот договор со Венецуела ќе се користи за надополнување на исцрпените стратешки резерви на нафта на САД за да се одговори на глобалните прекини во снабдувањето и високите цени на горивата.
Во објава на социјалните мрежи, Трамп потврди дека наскоро ќе започне процесот на обновување на стратешките резерви на нафта, опишувајќи ја нафтата од Венецуела како „подарок на Венецуела за народот на Соединетите Американски Држави “, пренесува Ројтерс.
Не е јасно колку брзо договорот со Венецуела би можел да обезбеди нафта за стратешките резерви на САД или да донесе какви било краткорочни придобивки за американските возачи, според Ројтерс.
Договорот што го објави Трамп во петокот има за цел да ја оживее ослабената нафтена индустрија на Венецуела, но ќе бара значителни инвестиции и инфраструктурни работи пред да може да се зголеми производството, додаде агенцијата.
Стратешките резерви на САД држеа околу 290 милиони барели нафта на 21 август, близу до 44-годишното дно, бидејќи САД ги намалија залихите за време на администрацијата на претседателите Џозеф Бајден и Трамп како одговор на глобалните прекини во снабдувањето, вклучувајќи ја војната во Украина и конфликтот со Иран.